Покш седей, валдо ойме ломань
Монень зярыяксть савкшны важодемань коряс улемс Саран ошсо. Весть вастовинь Римма Дмитриевна Жегалина марто. Нама, мон сонзэ сеске содыя. Ды кода а содамс истямо ломаненть? Те ульнесь МРИО-нь пидема-панема нупальсэ. Морга экшсэ аштемстэ сась ваксозон эрзянь оршамопельсэ тейтерь- ава. Шумбракстнинек, озась каршозон. Ярсамодо мейле ютксонок ушодовсь кортамо. Кода кортыть, ломантне - а ярмакт, коморо потс а сювордасыть. Обуцяст содамга эряви пондо сал сэвемс. Монень сеске марявсь, што Римма Дмитриевна ломанесь панжадо ойме, кортакшов. Сонзэ марто кортамсто прят марят олясто, валтнэ сынсь эцить превезэть, конатнень эряви нолдамс тевс. Сон кевкстимем костонян мон. Кодак евтыя Отяжбуе енксонть, сеске кевкстема: "А кодамо велестэ?". Меринь, што Кулязбуень, важодян Отяжбуень омбоце школасо эрзянь келень ды литературань тонавтыцякс. Сонзэ чамазо цитнезевсь кеняркссо. Кода толковизе, што сон эсь важодема кинзэ ушодызе те школастонть. Ицялонь педучилищанть якстере диплом марто прядомадо мейле кучизь важодеме Кулязбуень школав, конась се шкане лововсь сехте вадря школатнестэ вейкекс. Кавто иеть тонавтсь тесэ эйкакшт. Те вастовомась ульнесь кеветее иеде икеле. Сонзэ пек покш мелезэ ульнесь самс школав инжекс. Макссь вал самс. Но вана истят ломантнень а саты шкаст. Римма Дмитриевна целанек чопавтсь тиринь келень - койтнень ванстомань тевтнес. Зяро эрямонзо перть пурнась - ладсесь сон, можналь теемс ды нолдамс аволь вейке книга. 2011 - це иестэ окойники нолдазель книгазо М.А.Кастренэнь вейсэндявксонть (Финляндия) ярмаксо лездамонзо вельде "Мельстуиця эрзянь кель" ("Сердцу милый эрзянский язык"), козонь совасть стихть, ловомкат, морот, сцена лангсо налксемат, покшчинь ды чокшнень сценарийть, эрзянь келень урокт. Те книгась маштови аволь ансяк минек тиринь енкссо, но и масторонь келес эриця эрзятнень туртов, кие снарты тонавтнеме тиринь келенть. А стякояк Римма Дмитриевна нолдызе сонзэ Интернетс - кадык весе тонавтнить, кадык весе ловныть, ютавтнить покшчить, ветить урокт. Римма Дмитриевна ней уш пенсиясо, школасо а важоди. Ансяк мелявтовтыця тевде оймсеме а туекшнить. Эзь туе эрзянь раськень тевтнеде сонгак. Чистэ - чис важоди неть тевтнесэ. Покш Игнатбуень школасто туемадо мейле куншкакуросо ули "Пизелнэ" ветеранонь ансамбля - Римма Дмитриевна моры тосо. Оште эйкакш марто важодемстэяк пурнакшнось поэзиянь кужине "Килейне", мейле - "Тештине", косо сермадсть стихотвореният, морасть морот. Моротнеяк эрзянь кельсэ сермадозь-ладсезь сонзэ превсэ - седейсэ. Сты - тейни эрзянь оршамопельсэ някат, а зяро стась эйкакштнень туртов, бажась, кадык сынь марясызь келень содамонь кенярксонть, минек койтнень - кирдатнень мазычист ды питнейчист. Эсензэ лангсояк оршамопелесь анокстазь эсь кедьсэнзэ. Зяро мазычи, оймень лембе путозь анокстамстонзо! 2015 -це иень якшамковонь кемготовоце чистэ Римма Дмитриевна мусь шка ды сась миненек инжекс. Те вастовомась ульнесь кенярксов, хоть и пек мелявтыньгак. Сонзэ неемстэ ютась ризксэмгак. Ледсь мелезэнь васенце вастовомась, конась ульнесь лембе, кемемань. Римма Дмитриевна ютась школаванть, дивсесь, кода сон полавтызе чачонзо, мейле совинек классос, косо учость эйсэнзэ тонавтницятне. Мон содавтынь эйкакштнень сонзэ марто, ламот содызь инженть, секс што журналсо "Чилисема" вастневсть фотографият ды печатазь сермадовксонзо. Римма Дмитриевна евтнесь эрямонь ды шкинемань кидензэ, ловнось стихотвореният, морась зярыя морот. Мейле сайсь мель кунсоломс эйкакштнень, конат сермадыть стихотвореният, евтнемат. Снимасть ледстнемань кис вейсэ. Лия классо учость ушодкс классонь тонавтницятне. Зярдо совинек, сеске марявсь ютксост кодамо - бути анеявикс, теке марто, прок умонь .сюлмавома. Римма Дмитриевнаньгак ды эйкакштненьгак сельмсэ кирвазсть сяткинеть. Эдь Римма Дмитриевна ламо иеть важодсь вишкинетнень марто - вельмевтсь эрзянь толкельть сынст седейтнес. Зяро ойме путсь ды путы сыненст - кадык сынь содыть эсест тетяст - аваст келенть, минек раськень койтнень - кирдатнень. Эряви тешкстамс, што Римма Дмитриевнань икеле аштесть овсе асодавикс эйкакшт. А кода колсто ветясь мартост кортамо, неявсь вемельсэ важодема. Вейсэ морасть моро, ютавтсть налксема. Слов дороже в мире нет. Вместе с старшим братом Я слова учу. Знать язык эрзянский Очень я хочу. МОРОЮТКОСЬ: АВАЙ - это мама, ТЕТЯЙ - это папа, ШУМБРАТ! - здравствуй и привет!- Слов дороже в мире нет. КУДОМ - это дом мой, ЯЛГАМ - это друг мой, ШУМБРАТ! - здравствуй и привет! - Лучше слов на свете нет. Мон ялаксон марто, Келенть тонавтнян, Эрзякс сонзэ марто Кортамо карман. МОРОЮТКОСЬ: Лелянь марто вейсэ Валт мон тонавтнян, Эрзякс паро мельсэ Кортамо карман. МОРОЮТКОСЬ: Лелят - ялакст вейсэ Кель тонавтано, Покштянь - бабань кельсэ Минь кортатано. Школантень эсензэ пельде паронь арсезь васенце важодема тарканзо ледстямга казсь книга, кона ледстязель, ды диск. Истя жо моненьгак казсь эсензэ кедьсэ стазь, викшнезь юдмине, козонь путови сотовой телефон эли мезеяк лия. Седе мейле вастовсь тонавтыцятнень марто, конатнень ютксо ульнесть сеть, кинь марто важодсь, кинь тонавтсь. Кортыть, ломанентень эрямось максови паро тевень теемс. Ды ансяк аволь весе мельсэст кирдить Пазонь те мереманть - кармавтоманть. Эрямось прок виев чадыведь эряскадозь чуди икелев. Эрьва чинь пиксемасонть стувтови, мезень кис сынек масторлангонтень. А арсезевтяно сень кувалма, кодамо челькс эсенек мельга кадтано. Зяро ломанть, зняро жо обуцят. Кизэяк-янозояк эрьванть эсензэ. Кинь валаня, пирявкстомо, тевензэяк прок ой ланга ютыть. А кинень сави ютамс истямо, валомс аволь аламо ливезь, штобу топавтомс путозь бажамонть. Римма Дмитриевнань уцяскась ков ансяк эзизе пачтякшно. Ульнесть кенярксов иеть Московсо, васенце важодемадонзо мейле. Ленинэнь лемсэ пединститутсо тонавтнемась ульнесь пек покш бажамозо. Ды арсеманзо педе пес топавтовсть, дефектологиянь факультетэнть тагояк прядызе якстере диплом марто. Се шкава вузонть прядомадо мейле ульнесь кучозь тов, косо эрявсть специалистт. Вана истя кавксо пель марто иеть сон важодсь Саратова енксонь Салтыкова рузонь велесэ. Тоско лиссь мирденень, чачсть церазо ды тейтерезэ. Тиринь енкссто ве ено эрязь, седеезэ ризнэсь, тердсь тов, косо чачсь-кассь. Те сехте малавикс ды вечкевикс таркась - Покш Игнатбуе. Тестэ Бочкаревтнень кудораськесь 1950 иетнень ушодомсто тусь эрямо Орданьбуев, косо колхозонь прявтокс важодсь кудонь прявтось, Дмитрий Мокеевич. Те эрзянь велесэнть чачсь Римма Дмитриевна, ожоковонь 10 -це чистэ. Зярыя шкань ютазь састь мекев эрямо тиринь велев. Школасо тонавтнема, мейле педучилища, важодема, мейле таго тонавтнема, важодема омбо ено, меельцекс- важодема тиринь велесэ мельстуиця тевсэ. Школас а сеске понгсь.: чаво таркат арасельть. Савсь важодемс лиясо. Ютась ковдо ламо вастовомадонть мейле, ялатеке арсят, што те ульнесь исяк. Кодат мазыйть, седейс токицят, ванькст ды валдот сонзэ сермадовкстнэ: стихотворениятне, моротне…! Ламо содавикс рузонь морот ютавтсь эрзянь кельс, вечкевикс моронь мелодия лангс сермалесь зярыя эрзянь текст. Седе мейле прязонзо састь стиховореният ды мелодияяк. Истя аламонь - аламонь таштавсь эрзянь моронь паргинезэ. Римма Дмитриевна ламонень ашти невтевксэкс, кода и Серафима Марковна Люлякина, сеньсэ, што астяко пии-лаки эрявикс тевсэнть. Сынь кувать шкас ульнесть ялгакс ды свал ульнесть вейке-вейкень туртов алкуксонь нежекс, малавикс ломанекс. Мельс ледстявить Римма Дмитриевнань валонзо: "Бути эрьвась эсь таркасонзо мезе - бути теи эрзянь келень ванстоманть лезэс, а емить а келесь, а койтне, а раськесь. Эряви ансяк путомс тенень эрьванть виензэ". Мон весе седейсэ аштян сонзэ валонзо ено. Алкукскак, ламось ашти эрьванть эйстэ, седеяк ламо - тиринь келень кандтницятнеде. А эряви мадстемс эрзянь ойменть. Минь, Отяжбуень омбоце школань тонавтницятне ды тонавтыцятне, арсетяно Римма Дмитриевнанень кувака эрямо, уцяска, вечкема, од изнявкст шкинемань тевсэ.
Г. КАЖАЕВА