Пазонь валось эсеть кельсэ сови домкасто седейс
Ритта Пророкке эри Финляндиясо, ну сеетьстэ важодемань тевтнень коряс сакшны Мордовияв. Минек республикасо авась эрясь вете иеть, секскак эрзянь келенть содасы пек вадрясто. Сынь Тамара Сергеевна марто теить вейке покш тев, конань баславизе рузонь Православной церьковась - ютавтыть Библиянть тиринь кельс. Лиякс меремс, те тевесь - ламо ломанень тев. Покш лезэ тенень путыть Отяжбуе енксонь ломантнеяк, те Нина Семеновна Адушкина (чачозь Андревелесэ) ды Татьяна Дмитриевна Рябова (тиринь велезэ Таразбуе). Ритта Пророкке ды Тамара Баргова евтнизь библиотекасо важодицятненень эрзянь кельс Библиянть ютавтомань историянзо. Те тевесь ушодовкшнось 200 иеде седе икеле. Сон ульнесь сюлмазь эрзятнень Христостнэнь кемемас совавтоманть марто. Библиянь ютавтомась мейле сезевсь ламо иес. Сон одс ушодовсь ансяк XX-це пингень 70-це ды 90-це иетнестэ Библиянь ютавтомань институтонть ветямонзо коряс. 1973 иестэ лиссть одс печатазь 1910-це иень ниле Евангелиятне. Седе тов вейке-вейке мельга нолдазельть Библиянь зярыя книгань од ютавтовкст. Те Иоаннонь пельде Евангелия (1990), Марконь сермадовт Евангелия (1995), Лукань коряс Евангелия ды Апостолтнэнь тевест (1996), Матвеень коряс Евангелия (1998). Эйкакштнэнень ульнесь нолдазь Библиянь евтнематне: Иисусонь эрямозо (1991) ды Библиянь ловномат (1993). Ней вана лись эрзянь кельсэ "Од Вейсэньлувось" од ютавксосо. - Минь, ютавтыцятне, бажинек чарькодевиксстэ пачтямс грекень кельсэ сермадозь текстэнть смустензэ, - евтни Тамара Сергеевна Баргова. - Эдь грекень ды эрзянь кельтне пек аволь вейкеть эсь структураст коряс. Ялатеке снартынек видестэ пачтямс ловныцянтень Библиянть домкачинзэ. Секскак текстэнть зярыяксть ловнызь Мордовиясо эриця христиантнэ. Библиясь ашти васенце таркасо ламоксчинь коряс масторлангонь весе лия кельс ютавтозь книгатнень ютксо. 2006 иентень "Од Вейсэньлувось" ютавтозель 1079 кельс ды весе Библиясь 422 кельс. "Псалтиресь" сермадозель кезэрень евреень кельсэ. Рузонь кельс Синодальной ютавтовксонть юрсо истя жо ашти те кедьсермадовксось, ансяк таркань-таркань вастневить валрисьметь эли валт кезэрень грекень ютавтовксто. Эрзянь кельс ютавтозь "Псалтиренть" юрось теке жо, кода рузонь Синодальной ютавтовксонтькак, ды сон теезь эрзянь келень неень шкань вешематнень мельсэ кирдезь. Минь Ритта марто арсетяно, што Пазонь валось эсеть кельсэ сови седе домкасто седейс. Курок сы шка, зярдо церьковасо службатне кармить молеме тиринь кельсэ. Инжетне тейсть казне эрьвантень, кие сакшнось те вастома таркантень. Ней Отяжбуень эрьва библиотекасонть улить тиринь кельсэ сермадозь "Псалтирь" ды "Од Вейсэньлув" книгатне. Теке жо чистэнть библиотекасо важодицятне вастовсть МР-нь заслуженной художникенть, МР-нь Прявтонь премиянь лауреатонть Анатолий Николаевич Барговонь марто. А.Н. Баргов - Мордовиясо содавикс художник, Н.П. Огарев лемсэ МГУ-нь Национальной культурань институтонь неень шкань искусствань ды традиционной народной культурань кафедрань профессор. Сонзэ картинанзо аволь весть невтневсть республикань, весероссиянь, раськеютконь ламо выставкатнесэ. Художникесь снартни теемс выставка Отяжбуесэяк. Эдь сонзэ вечкевикс тематнень ютксто вейкесь - эрзянь темась. Ламо картинасонзо артозь эрзянь кенярксчитне, озкстнэ, раськень оршамопельсэ минек мазый аватне. Аатолий Николаевич яволявтсь, што тедеде сонзэ паро ялганстэнь, содавикс художникентень Виктор Иванович Вечкановнень топодевельть бу 60 иеть. Вечканов калмазь Ботужелесэ, но сонзэ кадовсть ламо артовксонзо, ды Барговонь ули покш мелезэ невтемс ялганзо артовкстнэнь эсь раськензэ туртов. Паряк, те истя улияк! Вейке истямо выставка, косо пурназельть Барговонь ды Вечкановонь артовкстнэ, Отяжбуесэ ютавтозель 1997-це иестэ.
Г. КАЖАЕВА