Отяжбуень тонавтницятнень изнявксост
Эряви тешкстамс, што те Весероссиянь научно - практической конференциясь ютась од лем ало "Межкультурный диалог народов России", а икелев ульнесь "Диалог финно - угорских языков и культур". Важодсть колмо дискуссионной площадкат. 1. "Этнокультурное наследие". 2. "Культура речи как важная составляющая специалиста будущего". 3. "Искусство как форма выражения культуры народов". Программантень истя жо совавтозель киштемань пелькстамось. Тесэ эсь ерокчист жюринтень ды ваныцятненень невтизь киштемань вейсэндявкстнэ. Киштематне ульнесть эрьва кодамо раськень: мокшэрзянь, рузонь, таджикень, армянонь, узбекень, татаронь, карелэнь. Надежда Геннадьевна Сигимова эсь кортамонзо марто ульнесь васенце дискуссионной площадкасо "Тиринь валонтень, раськень шкинемантень вечкемань толнэнть вельмевтемась эйкакштнэнь оймесэ" ("Воспитание любви к родному слову, народному творчеству"). Эсь кортамосонть тонавтыцясь кортась сень кувалма, штобу эрзянь келень кандыйтне аволизь стувто эсест тиринь келест, покштятнень - бабатнень коест-кирдаст, раськень шкинеманть. Лотксесь ловноманть, книганть лезэвчинзэ лангс. Надежда Геннадьевна тешкстась: ламось ашти аволь ансяк тонавтнема кудотнестэ, а васняяк - кудораськестэ. Эдь эйкакшось ламо мезе саи кудосто. Сон неи, кирдить - арась тетязо-авазо, лия кудораськень ломантне книга кедьсэ, ловныть тензэ евкскеть, нурька стихотвореният. Ней уш аламо вастневить кудораськеть, косо книгась эрямосост саи аволь остатка тарка. -Паряк, монь арсеман ильведевезь? - максь кевкстема Сигимова. -Улить оште алкуксонь книгань ловномо вечкицят. Неень шкане ламот ютко шкаст ютавтыть телевизор икеле, кой-кить чинь-чоп "налкставтыть" сонзэ. Эйкакштнэ компьютертнэнь икельде а тукшныть, ютавтыть налксематнесэ ламо шка, конась а сатны тонавтнема тевенть паролгавтомга. Апак ловно ды домкасто апак чарькоде ловнозенть, кодаткак содамочитнеде кортамскак а мезть. А путан весе эйкакштнэнь аловныцятнень юткс. Улить кить ловныть, сеть парсте и тонавтнить, кортамонь культураст сюпав, невтить паро изнявкст эрьва кодамо шкинемань ды лия пелькстамотнесэ. Ламо содыця марто кортамоськак седе мельс тукшны. Секс покш мелем, штобу ловновольть книгат и покштнэ, и эйкакштнэ аволь ансяк рузонь кельсэ сермадозь, но и тиринь кельсэяк. Книгась - те содамочинь лисьмапря! Конференциянть ютавтомсто студенттнэнь ды 9-11-це классонь тонавтницятнень туртов ютавтовсь КВЕСТ - налксема, олимпиада, конась алтазь Литературань иентень. Минек тонавтницятне невтсть вадря содамочить. Колмотне юткстост сайсть таркат: Вечканов Максим 1 -це тарка (Отяжвеле школань 10-це классонь тонавтниця), Деньчев Эдуард 2-це тарка (ПСШ-2 10-це классонь тонавтниця), Русяйкина Маша 3-це тарка (Отяжвеле школань 11-це классонь тонавтниця). Эряви тешкстамс, што Отяжвеле школань тонавтницятне ардыть истямо пелькстамонтень аволь васенцеде, сакшныть свал тарка марто. Те пек паро. Эсь тонавтницянзо марто Ицялов ардтнесь Писчаскина Ольга Алексанровна, эрзянь келень ды тиринь литературань тонавтыцясь. ПСШ-2 тонавтницятне ардтнесть васенцеде. Весе конференциянь участниктненень максозельть сертификат, што сынь ульнесть участникекс, "Кие ламо ловны, се ламо соды" ("Кто много читает, тот много знает") номинациясонть тарка мартосетнень казизь дипломсо.
Г. КАЖАЕВА