Велесэ эрямось а шожда
Сабанцелень эрицятне лововить важодемань вечкицякс. Видеяк, тесэ важодемась ашти васенце таркасо. Те веленть ульцятнева ютамсто а неят иредезь ломанть, истя жо а неят кудо вакссо тевтеме озадо аштицят. Весе косо-бути котьмить-озить. Кие кудосо-кардазсо, кие пиресэ-паксясо. Веенов важодеме тукшныть кеменде ламо церат. Ламот покш оштнэстэ састь мекев. Нама, пек стака, ансяк а ков молемс, зярдо арасть кодаткак важодема таркат.
Эрить ломантне кие кода машты: кирдить ламо ракшат, озавтыть чурькат, секлат, модамарть, конатнень мейле миить.
Сабанцелень малав весе од ломантне тонавтнить ВУЗсо. Кочксить Саранскоень ды республикань томбалень тонавтнема таркатнень. Тесэ кеместэ важоди школаськак.
Школась тедеде анок вастомс малав сядо тонавтницят. Од тонавтнема иентень сон анокстась кизэнь перть. Комиссиясь ваннызе ды шнызе.
Бути улить эйкакшт, карми важодеме школась, ули школась - а сыреди велеськак.