Морось эжди оймензэ
Фабричнова Елена Ивановна - панжадо седей ломань. Эрямонь перть лездась аволь ансяк сазортнэнень ды ялакстнэнень, конатнеде ниле, натой сетнененьгак, конатнень неи васенцеде. Авась седей марязь, лембестэ евтни эрьва ломанденть ды чачома веледензэ. Ды кода а вечкемс Алова веленть! Тесэ - ундоксонзо-коренонзо, роднянзо-раськензэ. Тесэ ютась эйкакшпингезэ."Эрямом ульнесь аволь шождатнеде. Прядынь кавксо класст ды сеске карминь важодеме фермасо тувонь андыцякс. Шкась тунь а сатыль весе тевтнень тееме,- мизолдозь евтни Елена Ивановна. - Эринь кода весе. Лисинь мирденень, вейсэ эрятано уш ниленьгемень кавто иеть. Кавто эйкакшонок семияст марто эрить веено". Авась евтни эрямодонзо, прок моро моры. Вайгелезэ виев, мазый. А стяко моры "Лисьмаприне" ансамблясонть, конань пурнызе М.Д. Понетайкин. Эрзянь авась моры урнемат, лайшемат, ансяк сехте вечкевикс моронь жанрасонть марявить тензэ частушкатне. "Морасак частушканть, ойметькак кенярдозеви, - корты Елена Ивановна. - Эрямонь перть морось ульнесь тень паро оякс. Сы ойментень апаро, карман викшнеме ды моронь морамо"."Лисьмаприне" ансамблясонть морсить аволь од ломанть, ялатеке аватне а нузялдыть эрьва чистэ якамс репетицияв. Аловелень артистнэнь содасызь аволь ансяк Отяжбуесэ, мик лия районсояк. Ков иляст моле, вастыть эйсэст лембестэ. Августонь 25-це чистэ аватне морасть Покш кенярксчисэнть - 1000 иеть, кода эрзятне ды мокшотне вейсэндясть рузонь масторонть марто. Елена Ивановна весе седейсэ анокстась те чинтень: ставтсь эрзянь оршамкат, тонавтнесь ламо кезэрень морот.Кевкстемам лангс, кода кенеремс тееме весе тевтнень ды а "сивемс", Елена Ивановна кенярдозь мерсь: "Эряви вечкемс тевенть, апак вано стака сон эли шожда. Эряви, штобу седеесь мораволь, сестэ кодамояк стака а мутанзат".Е. Москаева, «Журналистика» отделениянь 4-це курсонь студенткась